Booking.com

Лалето (лат. Tulipa) е тревесто луковичесто многугодишно растение кое потекнува од Мала Азија. Латинското име произлегува од персискиот збор toliban (“турбан”) и се однесува на сличноста на цветните пупки на овие растенија со познатата капа од Блискиот Исток и Јужна Азија – турбан.
Во Холандија првите лалиња се донесени пред околу 400 години и од тогаш почнува нивното масовно одгледување, а благодарение на вкрстувањето денес се познати повеќе од 4000 видови. Цветовите може да им бидат еднослојни или полни, назабени, еднобојни, двобојни, а се сретнуваат во цела палета на бои, од бела, па до многу темни.

hortikultura.mk_Lale_3

Височината на растенијата зависи од видот и сортата и достигнува од 65-100 cm. Лалето се сади најчесто преку луковици во текот на есента до доцната зима (за да закорени до доаѓањето на првите мразови) на длабочина од 12-20 cm, зависно од големината на луковицата, на оддалеченост од 10-15 cm, а цвета рано на пролет, поточно од март до мај. Лалето најчесто е со еден цвет, но постојат и повеќецветни видови (T. praenstas, T. turkestanica) и нивни сорти на чии цветоносци има 3-5 цветови, па и повеќе. Најдобро е да се посади на сончево место, а мора да се внимава почвата да биде добро дренирана бидејќи ако е многу влажно луковицата ќе иструли.

Цветовите на лалињата се најчесто црвени, жолти, а поретко и бели. Бојата на различните сорти на лалиња е мошне разнообразна: од чисто бела, жолта, црвена, пурпурна, виолетова и речиси црна до комбинации од две, три или неколку бои. Цветовите на лалињата се отвораат широко на сонце и се затвораат ноќе и при облачно време.

hortikultura.mk_Lale_4

hortikultura.mk_Lale_5

hortikultura.mk_Lale_6
Кога ќе прецвета лалето, се препорачува да се одреже стеблото со цветот за да не троши енергија за созревање на семето, а листовите треба да се остават додека не пожолтат и овенат за да може луковицата да собере доволно храна за следната сезона. Тогаш се препорачува да се извади луковицата и да се чува на суво и ладно место.

Ако сакате да одгледате лале во домот треба да купите специјални луковици кои се третирани за одгледување на затворено. Посадете ги во саксија, покријте ги целосно со земја и чувајте ги на што постудено место. Кога ќе почне да растат покријте ги со весници за да не добиваат премногу светлина и да се издолжат стеблата премногу. Немојте многу да ги полевате, а кога ќе почне да расте цветот тргнете ги весниците и префрлете го лалето на потопло. Кога ќе прецвета продолжете со негата додека не овенат листовите. Следната година таа луковица насадете ја на отворено бидејќи во домот нема пак да цвета.

hortikultura.mk_Lale_7

hortikultura.mk_Lale_8

Loading...